చంద్రబాబుతో 'టైమ్ 100' డిన్నర్ కు హాజరవడం సంతోషంగా ఉంది: స్మృతి ఇరానీ

ఆంధ్రప్రదేశ్ ముఖ్యమంత్రి చంద్రబాబుతో కలిసి దావోస్ లో 'టైమ్ 100 ఇంపాక్ట్ డిన్నర్‌'కు హాజరవడం సంతోషంగా ఉందని కేంద్ర మాజీ మంత్రి స్మృతి ఇరానీ తెలిపారు. మంగళవారం నాడు జరిగిన ఈ కార్యక్రమంపై ఆమె సోషల్ మీడియాలో ఒక పోస్ట్ ద్వారా తన అభిప్రాయాలను పంచుకున్నారు. భవిష్యత్తుకు తగ్గ పాలన, సాంకేతికత ఆధారిత పరిష్కారాలు, ఆవిష్కరణల వ్యవస్థల ద్వారా భారతదేశ తదుపరి దశ అభివృద్ధిని ఎలా తీర్చిదిద్దాలనే అంశంపై ఈ డిన్నర్‌లో ప్రధానంగా చర్చ జరిగిందని ఆమె పేర్కొన్నారు.

డిజిటల్ పబ్లిక్ ఇన్‌ఫ్రాస్ట్రక్చర్ నుంచి మొదలుకొని భవిష్యత్ పరిశ్రమలకు అవసరమైన నైపుణ్యాలను అందించడం వరకు అనేక ముఖ్యమైన విషయాలు ప్రస్తావనకు వచ్చినట్లు స్మృతి ఇరానీ వివరించారు. విధానపరమైన దార్శనికతకు, క్షేత్రస్థాయిలో కార్యాచరణ సామర్థ్యాన్ని జోడించడం ఎంత ముఖ్యమో ఈ చర్చ నొక్కి చెప్పిందన్నారు.

"వికసిత భారత్ లక్ష్యం వైపు మనం అడుగులు వేస్తున్నప్పుడు, దేశ పోటీతత్వం కొన్ని కీలక అంశాలపై ఆధారపడి ఉంటుంది. విశ్వాసంతో సాంకేతికతను, సమ్మిళితత్వంతో ఆవిష్కరణలను, సంస్థాగత బలంతో ఆశయాలను ఏకీకృతం చేయగలగాలి" అని స్మృతి ఇరానీ తన పోస్ట్‌లో స్పష్టం చేశారు. ఈ చర్చ భారతదేశ అభివృద్ధి ప్రయాణంలో విధాన రూపకల్పన, అమలు ప్రాముఖ్యతను తెలియజేసిందని ఆమె పేర్కొన్నారు.